Autobiografía de F.W. Murnau

Aquí deixo o único texto autobiográfico que nos deixou Herr Plumpe, publicado aló polo 1928 en "Filmkünster. Wir über uns selbst". As imaxes son engadido meu.

Murnau caracterizado de Shakespeare.

"Son fillo da Terra Roiba, nacín en Westfalia. En Heidelberg e Berlin, estudei Historia da arte. Despois deume polos escenarios, rematando na escola de Reinhardt, onde interpretei varios papeis secundarios cos meus colegas, Conrad Veidt e Ernst Lubitsch. Fixemos varias xiras, co tempo e tamén da man de Reinhardt, iniciei a miña formación na dirección teatral.

A guerra fíxome acudir á fronte como oficial de aviación. Cando finou o conflito, regresei aos escenarios e marchei a Suíza. Alí o cinema cruzouse no meu camiño dunha maneira peculiar. Cando estaba en Zúric e Berna, dirixín varias obras, a embaixada alemá contactou entón comigo para rodar filmes de propaganda. Esa actividade atrapoume de inmediato, ata o punto de que decidín dedicarme por completo ao cinema.

A miña primeira longametraxe foi Der Knabe in Blau, mais descoñezo se chegou a se estrear. Porén, a segunda si que triunfou; chamábase Satanas. Seguíronlle Der Bucklige und die Tänzerin, Der Januskopf con Conrad Veidt, Der Gang in die Nacht e Der brennende Acker con Eugen Klöpfer, Nosferatu, Phantom, Schloss Vogelöd e Die Finanzen des Grossherzogs. Estes filmes xa me deran a coñecer antes de rodar as dúas películas con Jannings, Der letzte Mann e Tartüff, éxitos a nivel mundial. Despois fixen a miña última película en Alemaña, Faust, para a Ufa, antes de aceptar a oferta de Hollywood, porque creo que aínda me queda moito por aprender e América ofrecíame a oportunidade de seguir a desenvolver os meus plans artísticos. O meu filme Sunrise, é a mellor mostra do que quero dicir.

Tento explorar novos camiños artísticos en cada filme para atopar novas formas de expresión. Por outra banda, sonvos da opinión de que se o director afonda no proxecto, no canto de preocuparse pola especulación pecuniaria, terá repercusión."